تلّ القدم حتى ولو هي حافيه
و أخلف هقاوي من يشكك بالوعود
يحلى اللقا يوم النوايا صافيه
لكن حلاة الوعد و النيات .. سود
يا صاحبي .. يا بو العيون الغافيه
رمشك تحدّاني وأنا شخصٍ ودود
أكتب على جفنك قصيده وافيه
و أقرى على أهداب عينيك الردود
و إذا بغيت أبهرك أنا بالقافيه
آشوف نفسي منبهر فيك وأعود
الله يعلم بالامور الخافيه
ولا إنت يفضح خافيك بعض الشهود
حضنك .. ولمسات الكفوف الدافيه
و نظرات من عينك يخالطها البرود
يشهد لك الطب بأمورٍ شافيه
ريجك دوى للهجر و أنواع الصدود
و يشهد لك النحل بأمورٍ كافيه
يومه تحرّى خدّك أزهار و ورد
نورك سنى و أنوار غيرك طافيه
يا نور ما يحتاج كهرب أو عمود
أحلى كلامٍ منك ( إيه ) الهافيه
أسرع من التفكير في لحظة جمود
وأكره كلام منك ( لاء ) النافيه
تنفي أمل موت الحواجز و الحدود
بعض القلوب تموت موته جافيه
لكنّها تبقى على الذكرى خلود
يبقى الغلا يوم الفرص متكافيه
ما بين لب القلب و عروقه يذود
وتبقى الدموع فْبحر عينك طافيه
ويبقى غلاك لسجن صدري و القيود
هذي القصايد و العهود الوافيه
لْرضاك أخط أجزل معانيها و أجود
خل القدم تمشي و لو هي حافيه
وخل العواذل تكثر بْشك الوعود
دام اللقا يقبل بْنية صافيه
لا تبتعد عنّي إذا النيات سود